酒店雖然舊，但食早餐嘅環境喺咁多間之中，感覺最舒服。食物就...一般~

最後一日行程，第一個景點係上蓋勒特山，居高臨下睇布達佩斯景色。氣溫不知有幾多，只知大風到連我都吹起，凍已是經極限~

成團人食飽西北風後，就去咗漁夫堡。漁夫堡據說係紀念舊時防禦多瑙河嘅漁夫而命名。天晴、景靚、人開心加上係最後一日行程，謀殺咗百幾張相。

馬提亞斯教堂喺漁夫堡旁邊，係13世紀時貝拉四世下令興建的布達聖母教會堂。後因於15世紀時匈牙利國王馬提亞斯和皇后碧翠絲喺度舉行婚禮而改名，依度亦係匈牙利國王加冕嘅地方。教堂曾因土耳其佔領，被改為回教清真寺。之後又加入了巴洛克和新哥德建築型態，變翻天主教堂。自13世紀迄今，已多次維修，所以每次都拍唔到佢嘅全貌。

露宿漁夫堡也不錯~~

之後無行國會山莊，就去講到好靚嘅聖坦德，又名希臘小村。1200hrs.到咗之後，領隊話1500 hrs.集合。哎~~一條村得一條路、食埋飯，都唔捱到3點架，擺明賣豬仔。國會山莊喺漁夫堡隔壁都唔去，山長水遠嚟依到！為乜？為飲十足十罐頭沙丁魚汁嘅匈牙利魚湯，為買周圍都有得賣嘅辣椒粉，定為高少少嘅對換價？好多團友都感覺「迷」...

去完1896年為紀念匈牙利馬札兒民族在定居一千年而建嘅英雄廣場，就無聊返酒店休息一個鐘，之後食匈牙利晚飯。食飯嘅地方係酒店隔離，我哋邊飲紅酒、邊食傳統菜，邊睇民俗歌舞。表演者仲勁捉團友出去玩，我同珠女講，捉我一定扮跛，結果珠女被人出咗出去...哈哈。

食飽、笑飽就返酒店執行李，聽日0445 hrs. 搭飛機返香港。